Wednesday, May 07, 2008

ലോനപ്പേട്ടന്റെ യോഗം

ചാലക്കുടിക്കാരനായ ലോനപ്പേട്ടന്‍ ഗള്‍ഫില്‍ വന്നത് കൊറെ കാശുണ്ടാക്കുക, നാട്ടില്‍ പോയി ഇഷ്ടമ്പോലെ ബ്രാന്‍ഡി കുടിക്കുക , സൌകര്യം കിട്ടിയാല്‍ നാട്ടിലുള്ള കെട്ട്യോളെ നാലു തെറിവിളിക്കുക എന്നീ ജീവിതാഭിലാഷങ്ങള്‍ക്കുമാത്രമായിരുന്നു. ഗള്‍ഫിലെ മേസ്തിരിപ്പണി കഴിഞ്ഞ് മിച്ചം കിട്ടിയത് പ്രഷറും കൊളസ്ട്രോളും മാത്രമാണ്. രാത്രി ഒരു ഡസന്‍ ഗുളികകളും അത് ദഹിക്കാനായി രണ്ട് പെഗ് ജാക്സനും (ആഫ്റ്റര്‍ ഷേവ് ലോഷന്‍. മിക്കവരും ഇതടിച്ചാണ് മദ്യനിരോധനമുള്ള ചില ഗള്‍ഫു നാടുകളില്‍ പൂസാവുന്നത്) അടിച്ചിട്ടാണ് ലോനപ്പേട്ടന്‍ കഴിഞ്ഞു പോന്നത്.

ഒരു ദിവസം മാര്‍ക്കറ്റില്‍ വെച്ചാണ് അത് കാണുന്നത്. ക്ലാ ക്ലാ ക്ലീ ക്ലീ അതാ ഇരിക്കുന്നു ഒരു ബോര്‍ഡ്.

'പ്രഷറും കൊളസ്ട്രോളും പൂര്‍ണ്ണമായും സുഖപ്പെടുത്താന്‍ യോഗ . 3 ദിവസം ഫ്രീ ട്രെയിനിങ് . ട്രെയിനര്‍ - വിനോദിനി അയ്യര്‍ . സ്ഥലം അബ്ബാസിയ. പ്രവേശനം ആദ്യത്തെ അന്‍പതു പേര്‍ക്ക് മാ‍ത്രം. സംഘാടനം : ട്രാക്കി (Trichur Association of Kuwait Youngsters)'


കൊളസ്ട്രോളിന്റെ ഡസന്‍‍ കണക്കിനു ഗുളികകള്‍ കഴിക്കുന്ന ലോനപ്പേട്ടന്റെ ഹൃദയം ഇതു കണ്ട് ഇരുമ്പുലക്ക പോലെ മേലേക്കും കീഴേക്കും കുതിച്ചു. ആനന്ദലബ്ദിക്കിനി എന്തു വേണം. യോഗ ചെയ്താല്‍ പ്രഷറും കൊളസ്ട്രോളും കുറയുമെന്ന്. ഏതായാലും 3 ദിവസത്തെ കാര്യമല്ലേ അതും ഒരു കിളിപോലത്തെ പട്ടരു പെണ്‍കുട്ടി. പോരാത്തതിനു മ്മടെ തൃശ്ശൂക്കാരുടെ പരിപാട്യല്ലേ. രെജിസ്റ്റര്‍ ചെയ്തേക്കാം.

വീട്ടിലെത്തി ആദ്യം തന്നെ ലോനപ്പേട്ടന്‍ ട്രാക്കിയുടെ ആപ്പീസിലേക്ക് വിളിച്ചു.

ഹലോ
ഹലോ .. അതെ ലവളുതന്നെ.
ട്രാക്കിയുടെ ആപ്പീസല്ലേ
യെസ്. മേ ഐ ഹെല്പ് യു .
യോഗ ട്രെയിനിങ്ങിനു രെജിസ്റ്റര്‍ ചെയ്യാനാ.
നീങ്ക പേര് ?
ലോനപ്പന്‍
ലോണ്അപ്പനോ
അല്ല ലോനപ്പന്‍. L O N A P P A N. മനസ്സിലായോ .
വയസ്സ് എവളാ ?
52
ടെലിഫോണ്‍ നമ്പര്‍
- - -
വ്യാഴാഴ്ച മുതല്‍ മൂന്നു നാള്‍ പരിപാടി. രാത്രി ഏളു മണി ടൈം.
ശരി
ഏളു മണിക്ക് ഒരു മണിക്കൂര്‍ മുന്നാടി തണ്ണിയടിക്കണം. അപ്പറം ഒന്നുമേ ശാപ്പിടാത്.
ശരി. ജാക്സന്‍ മത്യോ ?
ജാക്സന്‍.. .. എന്നാ‍ പുതു ബ്രാണ്ടാ‍ ? മസാഫി പോതും.. താങ്ക്യു.

ലോനപ്പേട്ടനു അത് പുതിയ അറിവായിരുന്നു. മസാഫി കമ്പനിയും ജാക്സന്റെ പോലെ തണ്ണി ഇറക്കി തുടങ്ങിയോ ? യോഗ ക്ലാസിനു മുമ്പ് തണ്ണിയടിക്കണമെന്ന കാര്യവും പുതിയ അറിവാണ്. അപ്പൊ മൊത്തത്തില്‍ സംഗതി കൊള്ളാം. വൈദ്യന്‍ കല്‍പ്പിച്ചതും രോഗി ഇച്ഛിച്ചതും ഒന്ന്.

വ്യാഴാഴ്ച പതിവിലും നേരത്തെ ജോലി കഴിച്ച് റൂമിലെത്തി, ലോനപ്പേട്ടന്‍ റെഡിയായി. അറിയാവുന്ന സൂപ്പര്‍ മാര്‍ക്കറ്റിലൊക്കെ മസാഫിയുടെ ആഫ്റ്റര്‍ ഷേവ് അന്വേഷിച്ചു. കിട്ടിയില്ല. പിന്നെ രണ്ടും കല്പിച്ച് കൃത്യം ആറുമണിക്ക് തന്നെ സാധാരണ കഴിക്കുന്നതിനേക്കാള്‍ ഒരു പെഗ് കൂടുതല്‍ ജാക്സന്‍ ഒരു ഗ്ലാസിലെടുത്തു. രൂപക്കൂടിലേക്ക് നോക്കി അന്തോനീസ് പുണ്യാളനെ സാക്ഷിയാക്കി ഒറ്റവലിക്ക് കുടിച്ചവസാനിപ്പിച്ചു. പിന്നെ ടാക്സി പിടിച്ച് ട്രാക്കി പറഞ്ഞ അബ്ബാസിയയിലേക്ക് വെച്ചു പിടിച്ചു.

കൃത്യം ഏഴുമണിക്ക് തന്നെ യോഗാ ക്ലാസില്‍ ചെന്നു. ക്ലാസ് നടക്കുന്ന റൂമിലേക്ക് പാളിനോക്കി. അന്‍പതു പേര്‍ക്ക് നില്‍ക്കാന്‍ കഷ്ടിച്ച് സ്ഥലമുള്ള റൂമില്‍ നൂറോളം പേരുണ്ട്. എല്ലാം മധ്യവയസ്സു പിന്നിട്ട ചെറുപ്പക്കാര്‍. പലരും പുല്‍പ്പായയൊക്കെയായാണ് വന്നിരിക്കുന്നത്. ഇനി കിടപ്പും ഇവിടെയാവുമോ ? മൂട്ടകള്‍ അതിരു തിരിച്ച് പെയിന്റിങ് നടത്തി അടുക്കളയുടെ മൂലയ്ക്കല്‍ കുത്തിച്ചാരി നിര്‍ത്തിയ ആ പഴയ പായ എടുക്കാതെ വന്നതില്‍ ലോനപ്പേട്ടന്‍ കുണ്ഠിതപ്പെട്ടു.

ലോനപ്പേട്ടന്‍ ഒരു സൈഡ് പിടിച്ച് ചാരി നിന്നു. കൂടിനിന്നവര്‍ പലരും യോഗയുടെ ഗുണഗണങ്ങളെപ്പറ്റിയും രോഗശാന്തിയെപ്പറ്റിയും സംസാരിക്കുന്നു. യോഗ ചെയ്ത് ഒരാളുടെ ചൊറിച്ചില്‍ ഒരാഴ്ചകൊണ്ട് മാറിയതും യോഗ ചെയ്തതിനു ശേഷം പിണങ്ങിപ്പോയ ഭാര്യ തിരികെ വന്നതും ഒരു മാസം കൊണ്ട് എയ്ഡ്സ് മാറിയതുമെല്ലാം കൂലങ്കഷമായി ചര്‍ച്ച ചെയ്തു.

എല്ലാം കഴിഞ്ഞ് ഏഴുമണിക്ക് തുടങ്ങേണ്ട ക്ലാസ് തുടങ്ങിയപ്പോള്‍ ഏഴരയായി.

മുറിയുടെ ഏറ്റവും മുന്നിലായി ഒരു മേശ ഇട്ടിരുന്നു. മുഖത്ത് അരക്കിലോ കുട്ടിക്കുറയും നെറ്റിയില്‍ പപ്പടവട്ടത്തില്‍ കുങ്കുമവും പൂശി ടീഷര്‍ട്ടും ട്രാക്ക് സൂട്ടുമിട്ട് അന്‍പതു പിന്നിട്ട ഒരു മഹതി ആ മേശയ്ക്കു മുന്നില്‍ വന്നു നിന്നു.

ട്രെയിനര്‍ വിനോദിനി അയ്യര്‍.
വന്നപാടെ മേശയില്‍ കയറി ‍ ഇരുന്നു. ഏതോ റിട്ടയര്‍ ചെയ്ത ടീച്ചറാണെന്ന് തോന്നുന്നു.
ലോനപ്പേട്ടന്റെ മുഖം പാമ്പിനെ കണ്ട വെരുകിനെപ്പോലെയായി.
ആള്‍ സ്റ്റാന്‍ഡ് അപ്പ്
സിറ്റ് ഡൌണ്‍.
എവിടെ ഇരിക്കാന്‍. ചിലര്‍ നിന്നു. ചിലര്‍ ഇരുന്നു.
ആദ്യം ശവാസനമാണ്.
പായ കൊണ്ടുവന്നവര്‍ തിക്കി തിരക്കി പായയിട്ടു.
സമാധാനം. ആദ്യം കണ്ട പായില്‍ കയറി ലോനപ്പേട്ടന്‍ കിടന്നു.
എല്ലാവരും നിവര്‍ന്ന് കിടക്കൂ.. കണ്ണുകള്‍ അടച്ച്.. കൈകാലുകള്‍ ഫ്രീയാക്കിയിടണം. .. ശ്വാ‍സം മുകളിലോട്ട് എടുക്കണം. ലോനപ്പേട്ടന്‍ ശ്വാസമെടുത്തു.

പുലര്‍ച്ച കണ്ണു തുറന്നു നോക്കുമ്പോള്‍ മാത്രമാണ് താന്‍ കിടന്നിരുന്നത് ഏതോ ഫ്ലാറ്റിന്റെ വരാന്തയിലാണെന്ന് ലോനപ്പേട്ടനു മനസ്സിലായത്. ട്രാക്കിയുടെ യോഗ ക്ലാസ്സിന്റെ ഫ്ലെക്സ് ബോര്‍ഡിന്റെ ഒരു കഷണം കൊണ്ട് കഴുത്തുമുതല്‍ കാലു വരെ തണുപ്പടിക്കാതിരിക്കാന്‍ ആരോ മൂടിയിട്ടിരുന്നു..

അതിനു ശേഷം ദിവസവും കിടക്കുന്നതിനു കൃത്യം ഒരു മണിക്കുര്‍ മുമ്പ് ജാക്സന്‍ രണ്ട് പെഗ് കഴിക്കുകയും ശവാസനത്തിലേര്‍പ്പെടുകയും ചെയ്യുന്നത് ലോനപ്പേട്ടന്‍ ശീലമാക്കി. ഇപ്പോള്‍ കൊളസ്ട്രോളിനും പ്രഷറിനും നല്ല കുറവുണ്ടത്രേ ..

31 comments:

തോന്ന്യാസി said...
This comment has been removed by the author.
തോന്ന്യാസി said...

തേങ്ങ എന്റെ വക

എന്താന്നറീല്ല കൊറേക്കാലായിട്ട് തേങ്ങയടിയ്ക്കുള്ള യോഗം കൂടി വരുന്നുണ്ട്

കുറുമാന്‍ said...

മേന്നെ ഇത് രസിച്ചു വായിച്ചു.

kaithamullu : കൈതമുള്ള് said...

“കൊളസ്ട്രോളിന്റെ ഡസന്‍‍ കണക്കിനു ഗുളികകള്‍ കഴിക്കുന്ന ലോനപ്പേട്ടന്റെ ഹൃദയം ഇതു കണ്ട് ഇരുമ്പുലക്ക പോലെ മേലേക്കും കീഴേക്കും കുതിച്ചു.“

(-‘യന്ത്രവല്‍കൃത‘ ഉലക്കയുടെ അടിയില്‍പ്പെട്ട് ചതഞ്ഞരഞ്ഞ പാവം ഗുളികകള്‍!)

എന്തായാലും ഈ ജാക്സന്‍ ഒരു സംഭവം തന്നെ, മേന്‍‌ന്നേ!
തകര്‍ത്തൂ.....

വല്യമ്മായി said...

:)

Noti Morrison said...

Very good :-)

നന്ദു said...

പാവം ലോനപ്പേട്ടൻ...! ഇഷ്ടായി കഥ :)

അനൂപ്‌ എസ്‌.നായര്‍ കോതനല്ലൂര്‍ said...

ഈ ലോനപ്പേട്ടന്‍ ആളു കൊള്ളാലോ

അത്ക്കന്‍ said...

1001കതിനാവെടി എന്റെ വക മേന്നെ.
ശ്ശി രസിച്ചൂട്ടൊ....

ശ്രീവല്ലഭന്‍. said...

"ഇപ്പോള്‍ കൊളസ്ട്രോളിനും പ്രഷറിനും നല്ല കുറവുണ്ടത്രേ .."

അത് തന്നെ വല്യ കാര്യം....:-)

malayalamblogroll said...

മേനോന്‍ ചേട്ടാ, അടിപൊളി.

തമനു said...

ഹഹഹഹഹ ..... മേന്‍‌നേ അടിപൊളി..

നല്ല രസമായി ... പാവം ലോനപ്പേട്ടന്‍... :)

എന്റെ ഒരു കൂട്ടുകാരന്‍ യോഗാക്ലാസില്‍ ശവാസനം ചെയ്തോണ്ടിരിക്കേ ട്രെയിനറോട് ചോദിച്ചു ... “ചുമ്മാതെ കെടന്ന് ബോറഡിക്കുന്നു സര്‍, ഞാനൊരു ബീഡി വലിച്ചോട്ടെ” എന്ന്.. !!!

മുസാഫിര്‍ said...

ഹ ഹ ,ലോനപ്പേട്ടനോട് ജലാസനം ചെയ്യാന്‍ പറയാതിരുന്നത് നന്നായി , അല്ലെങ്കില്‍ വെള്ളത്തിന്റെ മുകളീല്‍ വെള്ളത്തില്‍മുങ്ങി ആകെ കുഴഞ്ഞേനേ .

ആഗ്നേയ said...

ഈ ലോനപ്പേട്ടന്റെ വീട് ചാലക്കുടിയല്ല.
പാവറട്ടീലാ‍ാ‍ാ‍ാ‍ാ‍ാ‍ാ:-)

Sands | കരിങ്കല്ല് said...

ഇപ്പോള്‍ കൊളസ്ട്രോളിനും പ്രഷറിനും നല്ല കുറവുണ്ടത്രേ ..

:) - എനിക്കിഷ്ടായി.

അഭിലാഷങ്ങള്‍ said...

ങും.. എന്നാലും ട്രെയിനര്‍ വിനോദിനി അയ്യര്‍... !

ആ പേരു കേട്ടപ്പോ ലോനപ്പേട്ടന്റെ മനസ്സില്‍ ഉദിച്ച രൂപം എന്തായിരിക്കും.. കണ്ടപ്പോള്‍ തോന്നിയ ചിന്ത എന്തായിരിക്കും.. അതൊക്കെ എനിക്ക് ഈസിയായിട്ട് ഊഹിക്കാം.. പാവം ലോനപ്പേട്ടന്‍..

ഓഫ് ടോപ്പിക്ക്:

ലാസ്റ്റ് മന്ത് (മാസം... മറ്റേ മന്ത് അല്ല) ദുഫായില്‍ എല്ലാ വെള്ളിയാഴ്ച്ചയും ഒരു ഓര്‍ഗനൈസേഷന്റെ ഭാഗമായി യോഗാ ക്ലാസ് തുടങ്ങിയിരുന്നു. ഞാനും എന്റെ കസിനും (ബ്രദര്‍) ജോയിന്‍ ചെയ്തു. കസിനിനായിരുന്നു കൂടുതല്‍ ഇന്ററസ്റ്റ്. യോഗക്കിടയില്‍ എല്ലാവരോടും ട്രയിനര്‍ കിടന്ന പൊസിഷനില്‍ 1 മിനിട്ട് റിലാക്സ് ചെയ്യാന്‍ പറഞ്ഞു. 40-50 ആളുകള്‍ ഉണ്ടായിരുന്ന ആ ഹോള്‍ നിശബ്ദമായി. എല്ലാ‍വരും റിലാക്സ് പൊസിഷനില്‍! ഒരു മൊട്ടുസൂചി വീണാല്‍ കേള്‍ക്കാവുന്ന നിശബ്ദത.

പെട്ടന്ന് ആ ഹാളിനെയും, മനശ്ശാന്തിയോടെ റിലാക്സ് ചെയ്യുന്ന ഹാഫ് സെഞ്ച്വറിയിലധികമുള്ള ആളുകളെയും, ചുമ്മ കിടന്ന് റിലാക്സ് ചെയ്തോണ്ട് തലേന്ന് കണ്ട സിനിമാകഥ ആലോചിച്ചോണ്ടിരുന്ന എന്നേയും ഞെട്ടിച്ചുകൊണ്ട് ഹാളില്‍ ഒരു ശബ്ദം

“ങുര്ര്ര്ര്ര്ര്ര്ര്ര്ര്ര്....... ങുര്ര്ര്ര്ര്ര്ര്ര്ര്ര്ര്ര്ര്ര്......”
“ങുര്ര്ര്ര്ര്ര്ര്ര്ര്ര്ര്....... ങുര്ര്ര്ര്ര്ര്ര്ര്ര്ര്ര്ര്ര്ര്......”

എന്റെ കസിന്‍ ആ കിട്ടിയ 1 മിനിട്ട് കൊണ്ട് ഫ്രൈഡേ ആഘോഷിച്ച ശബ്ദമായിരുന്നു അത്. പുള്ളി നല്ല കൂര്‍ക്കം വലിച്ച് ഉറങ്ങുവാ.. എല്ലാവരും പുള്ളിയുടെ നേരെ ചിരിച്ചോണ്ട് നോക്കുന്നത് കണ്ട് ഞാന്‍ ഒന്ന് ഉരുട്ടിവിളിച്ചു....
പുള്ളിയുടെ അവസാന യോഗാ ക്ലാസായിരിക്കും അത് എന്നാ കരുതിയത്.. ബട്ട്, ഇപ്പോഴും പോകുന്നുണ്ട്... നോ നാണം നോ മാനം! നാളെയും പോകും പോലും... ഞാന്‍ 1 ആഴ്ചയേ പോയുള്ളൂ.. പണ്ട് ടൈപ്പ് പഠിക്കാന്‍ പോയ പോലെ.. :-)

തറവാടി said...

രസിച്ചു , തമനൂന്‍‌റ്റെ കമന്‍‌റ്റും :))

ഏറനാടന്‍ (എസ്‌.കെ. ചെറുവത്ത്‌) said...

മേന്‍‌നേ രസിച്ചു. പെട്ടെന്ന് തീര്‍ന്നല്ലോ. ഈ ലൊനപ്പന്‍ ആണോ ആ പണ്ടത്തെ ലോനപ്പന്‍? :)

lakshmy said...

രാത്രി ഒരു ഡസന്‍ ഗുളികകളും അത് ദഹിക്കാനായി രണ്ട് പെഗ് ജാക്സനും (ആഫ്റ്റര്‍ ഷേവ് ലോഷന്‍. മിക്കവരും ഇതടിച്ചാണ് മദ്യനിരോധനമുള്ള ചില ഗള്‍ഫു നാടുകളില്‍ പൂസാവുന്നത്)

ഒള്ളതോ?

വിനുവേട്ടന്‍|vinuvettan said...

മേന്‌ന്നേ ... ഇനിയും പറയൂ നമ്മുടെ നാട്ടിലെ മഹാന്മാരുടെ കഥകള്‍ ... എത്രയെത്ര കഥാപാത്രങ്ങള്‍ അല്ലേ...

കുട്ടന്‍മേനൊന്‍ said...

തമനു : ഈ യോഗ ക്ലാസില്‍ തന്നെയാണ് ശവാസനത്തില്‍ കിടന്നിരുന്നവന്റെ പോക്കറ്റിലെ മൊബൈലില്‍ നിന്നും ‘രാക്ഷസീ..’ എന്ന മനോഹര ഗാനം ഉതിര്‍ന്നുവീണതും :)

ആഗ്നേയ :ചൂണ്ടപ്പാടത്ത് എന്ന് ഞാന്‍ പറയണില്ല.

ഏറനാടാ : ഏത് ലോനപ്പന്‍ ?

കുട്ടിച്ചാത്തന്‍ said...

ചാത്തനേറ്: ചിരിപ്പിച്ചു. പക്ഷേ കമന്റുകള്‍ കൂടുതല്‍ ചിരിപ്പിച്ചു.:)

യോഗ പഠിക്കാന്‍ യോഗമുണ്ടായിരുന്നേല്‍ ഞാനും ഒരു യോ കമന്റിട്ടേനെ.:(

മച്ചുനന്‍ said...

ചിയേഴ്സ്...

My......C..R..A..C..K........Words said...

cholostrolum pressurum kuranjathu nannayi..illel kaanarunnu

സാല്‍ജോҐsaljo said...

:D

കൊച്ചു മുതലാളി said...

“യോഗ ചെയ്ത് ഒരാളുടെ ചൊറിച്ചില്‍ ഒരാഴ്ചകൊണ്ട് മാറിയതും യോഗ ചെയ്തതിനു ശേഷം പിണങ്ങിപ്പോയ ഭാര്യ തിരികെ വന്നതും ഒരു മാസം കൊണ്ട് എയ്ഡ്സ് മാറിയതുമെല്ലാം കൂലങ്കഷമായി ചര്‍ച്ച ചെയ്തു."

ശാസ്ത്രത്തിന്റെ ഒരു പോക്കേ !!!

ശ്രീ said...

കൊള്ളാം മേനോന്‍ ചേട്ടാ...
ഇപ്പഴാ വായിച്ചത്.
:)

കുഞ്ഞന്‍ said...

ഇന്നാണ് മേന്‍‌നെ ഇതു വായിച്ചത്

ലോനപ്പന്റെ മദ്യ ബ്രാന്റ് പുതിയൊരറിവ്..! എന്തായാലും യോഗ കൊണ്ട് ഗുണമുണ്ടായല്ലൊ.

കമന്റുകള്‍ കൂടുതല്‍ ചിരിപ്പിക്കുന്നു.

നിഷ്ക്കളങ്കന്‍ said...

മേനോനേ

:) ചിരിപ്പിച്ചു കേട്ടോ.

ഒരു സ്നേഹിതന്‍ said...

സംഭവം കലക്കിട്ടോ...
വൈകിയാണ് വന്നതെന്കിലും ഒരു തേങ്ങ എന്റെ വകയും കിടക്കട്ടെ...
ആശംസകള്‍...

bilatthipattanam said...

Bhaayi; This post I sent to publish in BILATHI MALAYALI PATHRAM....
Very nice story& narretion !
Thanks.